الاثنين، 29 نوفمبر 2010

فارس أحلامي

" الشاي يا أستاذة " شرويت "
دخل " زكي " العامل في الكافية اللي جنب المعرض بالشاي اللي طلبته منه أول ما فتحت المعرض
إية ده أنا مخدتش بالي ازاي ان "زكي " دخل ...؟!!
أه ...ما كنت مش عارفة أرد علي اللي واقف أدامي ده بإية لما سألني عن إسمي " مقولتليش يا ام العيون الجميلة ...انت اسمك إية ...؟"
بصيت ف الارض وأنا متغاظة من " زكي" يا مغفل أنت كان لازم تيجي دلوقت ...
" شرويت .....إسم جميل زي صاحبته...." قال
" زكي" حط الشاي علي المكتب وقالي " أي خدمة تانية يا أستاذة ...؟
قلت بسرعة عشان يمشي " متشكرة يا زكي "
وحمدت ربنا أنه مشي وطلع بره المعرض خلاص , وبصيت تاني للأستاذ اللي ادامي ولسه هتكلم لقيت " زكي " رجع تاني
عايز إية ده ...الله يخرب بيتك هتوديني ف داهية
" نسيت اقولك يا أستاذة ....انا محتاج كتب الكلية بتاعة السنة اللي خلصت ..."
قلت وانا بحاول اتخلص منه " حاضر يا زكي ...هجيبهملك وانا جاية بكرة "
لاحظ اني بحاول امشيه وخلاص فقال " لاء ...خلاص ..."
ومشي وهو زعلان .....
حسيت بالذنب واني بجد كنت سخيفة ...عشان كدة سيبت المكتب ومشيت وراه وناديته " زكي ...زكي ..."
وقف والتفت وبص لي  وهو زعلان ..." نعم ..."
قلت وانا بحاول ابتسم " أنا محضراهم لك زي السنة اللي فاتت ...روح البيت خدهم من ماما "
رد بابتسامة خجولة " متشكر اووي يا استاذة "
" ده إية الاهتمام ده " قالها  بطريقة لم تعجبني
التفت إليه وأنا مضايقة " يا أستاذ هاني ...حضرتك عايز إية ؟ "
قال بهدوء " هاني ...قوليلي هاني من غير أستاذ ...."
قلت " مينفعش ..."
" مينفعش لية ؟ " رد عليا
قلت وأنا أعقد ذراعي وأنظر له " عشان معرفكش ..."
قال بابتسامة غير مفهومة " ولكن أنا ساعرفك حتما ...."
ومش خطوتين ثم إلتفت إلي قائلا " أنا هجي كمان يومين ...للحاج "
أيوووووووووووة  علي الكلام اللي بمعني تاني  يا جدعان ....
########                                         ##########                                     #########
يومها معرفتش إية اللي حصلي
لما روحت البيت كنت حاسة اني تايهة ...مش عارفة أكل ...مش عارفة أنام ...مش عارفة أتكلم ....حاسة اني في دنيا تانية ...
ماما تسألني " يلا عشان ناكل .."
ارد عليها " مش جعانة "
" غريبة ...دا انت كنتي دايما تيجي من بره ميتة م الجوع إية اللي حصل "
"مفيش ...مش جعانة ....أكلت ف المعرض ..."
أختي الكبيرة جات هي واولادها وجوزها ....
كنت أنا  في البلكونة بسمع عبد الحليم وسرحانة ....
قالتلي " أقطع دراعي ان ما كان حصل ...قولي يا بت انتي ...."
مردتش عليها ....
" شيييييييييييري....؟"
قلت " أيوووووووووووة  يا " زهرة "
شدت الكرسي  وقعدت جنبي وقالت " اصل ماما بتقول انك من ساعة ما جيتي من المعرض وانت مش علي بعضك ومكلتيش حاجة ومش بتتكلمي ولا عاملة دوشة زي عادتك ...قلقت عليك إتصلت بيا عشان اجي اشوف في اية ؟ ...ولما لقيتك سرحانة مع حليم ...قلت بس ..يبقي حصل ....ها قولي بقي دا احنا إخوات ...."
إتنهدت وقلت " آه يا زهرة .... مش عارفة أقولك إية ...؟ "
قالت بلهجة حكيمة " قوللي كل اللي انت عايزة تقوليه بس قولي وخلصيني ..."
قلت " النهاردة ف المعرض شوفت شاب ...زي الافلام والروايات ....يا لهوي ...جسم رياضي إية وعيون إية ...وشعر إية ...وجمال إية ...أنا مش عارفة ...ده هو دهى فارس أحلامي ....معرفش إية اللي حصل ..ده باينه حب من النظرة الاولي ...
قالت " ها ......وعرفت عنه إية ؟ وكان جاي المعرض لية ...؟ الا يكون جاي ياخد جهاز لنفسه وهيتجوز ...؟"
قمت مفزوعه من علي الكرسي " حرام عليك ...آه ...صحيح ...ممكن يكون هيتجوز ..., طب وبعدين ...هعمل إية ؟"
أختي كانت عاقلة ومش رومانسية زي حالاتي قالتلي " أنت عرفتي عنه حاجة ...؟ "
قلت " لاء ......هو ساب الكارت بتاعه للحاج ..."
قالت " وفين الكارت ده ؟ "
قلت باستغراب " في المعرض طبعا "
مطت شفتيها وقالت " غبية طول عمرك عبيطة ومبتعرفيش تتصرفي ..."
قلت وانا متغاظة منها " إية بس يا زهرة متغلطيش بقي لو سمحتي "
قالت بسرعة لما حست اني زعلت " معلش احنا آسفين يا ستي ....بكرة هاتي الكارت وانا هجيبلك قراره , بس دلوقت تعالي كلي أي حاجة الا كدة ماما هتقلق عليك ...وبعدين تقول لبابا وانت عارفة الباقي ...."
قمت معاها وانا لسة حاسة بالتوهان ولسة حاسة بنظرته وكلامه ......
##############                               ##############
 تاني يوم صحيت وروحت المعرض من بدري .....
اصلا مكونتش نمت .....وفتحت المعرض وقعدت علي المكتب أفكر ....
" صباح الخير ..."
كان هو ....
معرفتش اخبي فرحتي  واستغرابي  " صباح النور ...انت قلت انك هتيجي للحاج كمان يومين ...؟ "
ابتسم ابتسامة حلو اووي وقال ..." الصراحة ....أنا جيت عشان أشوفك انت ..."
و.....
أكمل بكرة ...

هناك 19 تعليقًا:

أنا وحماتي يقول...

أيوووووة
بجد مش عارفة اقول إية
بحركة غباء مني عشان لسة جديدة ومش عارفة اعمل اية في المدونة بعد ما نشرت التعليقات حذفتها ...اهيء اهيء ..بجد زعلانة
آسفي لشمس النهار ودكتورة ولاء ومدونة ما كفاية بق وخواطري مع الحياة ...وان شاء الله هشوف مدونتكم

ツSmiLeY AnGeLツ يقول...

السلام عليكم
غلطة وهتتعلمي منها
بعدين ايه الرومنسية دي
ده شكله وقعك وقعة لحد ماتزوجكك
مستنيه الباقي
تقبل مروري
سلامي لاجمل وارق شيري.

مدونه ما كفايه بقى يقول...

بقولك ايه كملى القصه كامله

انتى كده بتعلقينى

ياما نفسى فى الرومانسيه دى

يلا بقى نصيب

تحياتى

Noha Saleh يقول...

مدونتك هايلة اسما وشكلا وضمونا
بجد جميلة اوى
تعرفى انا بس كنت خايفة لما دخلت لان كان فى حاجة كده بحضرها خاصة بالحموات بس طلعت مختلفة كتير الحمد لله
بجد ربنا يوفقك مدونتك جامدة جدا

باحث عن حب يقول...

مدونه رائعه
واسم حلو خالص
يارب يريح بالك
ياريت
يكبرى الخط
شويه
صغننه

Wise يقول...

السلام عليكم ورحمة الله وبركاته
واضح كده ان القصه هايله
وانا نفسى اتابعها
بس ليا طلب صغنون
انا عارفه انى رخمه ايه اللى داخله من اولها وتطلب ده كمان
تلاقيكى بتقولى هو انا نقصاكم انتو كمان
معلش تعالى على نفسك المرة ده ويبقى اخر طلب
ياريت لو ينفع الخط يكبر شويه
دمتى بكل خير

Tamer Moghazy يقول...

ايه ده...
هي المدونة لسه جديدة..؟؟
مممممممم..
عشان كده لسه ريحة الجدران والدهانات هههههه :)

مبروك المدونة اللي اكتشفت اني قريتها كلها من غير ما احس بالوقت..
وطبعا فكرتها حلوة جدا وكمان طريقة السرد بتاعتك (ودودة) جدا..
واضح انك عندك ذاكرة بتحفظ ادق التفاصيل :)

Dr/ walaa salah يقول...

لا بجد ده جرئ اوي

بس صحيح احنا ليه ما اخدناش بالنا انه ممكن يكون جاي ياخد جهاز عشان يتجوز

شفتي كل اللي داخلين عندك رومانسيين ازاي وعقلهم واخد اجازه

انا في انتظار التكمله يا شيري ^-^

شمس النهار يقول...

معلش ولا يهمك

نروح نعمل تعليقات تانيه
اصل اول تعليق في اول بوست بيبقا له ذكري حلوة

ومكمله معاكي القصه ان شاء الله
بس بحبحي ايدك شويه في الاحداث
:)))

ماتعلقيناش كتير كل حلقة
:)))

أنا وحماتي يقول...

خواطري مع الحياة
منوراني
والله هتعلم ان شاء الله
وسلامي لك
بس بجد زعلانة لان اول تعليق ده كنت مبسوطة بيه اوووي

أنا وحماتي يقول...

مدونه ما كفايه بقى
اه...هتعلم أكيد والواحد مبيتعلمش بالساهل
استني شوية كله بالصبر

أنا وحماتي يقول...

Noha Saleh
بجد انت اللي مدونتك وموضوعاتك مشاء الله عليها
تتحسدي بجد

أنا وحماتي يقول...

محمود(باحث عن حب
اهلا وسهلا بيك
حاضر ...انا بس مخدتش بالي والله

أنا وحماتي يقول...

Wise
لا والله بالعكس
إنت تؤمري
ونورتيني

أنا وحماتي يقول...

Timo
اممممم...؟ ههههه...؟ فعلا شامم ريحة البويية....؟
متشكرة لكلامك انت مدونتك بجد رائعة ...
عندي فعلا ذاكرة قوية ...بس انا مش بفتكرة القسوة علي فكرة ...انا انسانة طيبة بجد

أنا وحماتي يقول...

Dr/ walaa salah
علي فكرة انت كنت تقريبا اول يا تاني تعليق ..انا فاكرة ده كويس
انت وشمس النهار بجد منوراتي يا دكتورة

أنا وحماتي يقول...

شمس النهار
حااااااضر من عينية الاتنين...
انا قلت انك انت والدكتورة ولاء تقريبا اول وتاني تعليق ...بجد كنت مبسوطة لدرجة مش معقولة
نورتني

Dr. Ibrahim يقول...

منتظرين البقية
وبالنسبة لموضوع تشابه أفكار المدونات
نعم هناك تشابه ولكن ليس هناك تشابه بين الأفكار فى داخل المدونة فحتما هناك تجارب مختلفة "وليس كل أصابع اليد مثل بعضها" فالإنسان يجب أن يرى تجارب غيره فحتماً هناك فائدة..
تحياتى الخالصة

هبة فاروق يقول...

اهلا بكى فى عالم التدوين
مدونتك فكرتها جديدة وعجبتنى والاجمل
كتاباتك فى انتظار البقية
واسمحيلى اكون صديقتك واتابعك