الخميس، 27 يناير 2011

عشاني .............أنا

لما لقيته ادامي .....فرحت أووي وخبيت فرحتي جوايا ...بس فرحتي كانت ظاهرة في عنيا أكتر...
لما قالي انه جه عشاني انا.....مقدرتش اخب فرحتي .....
قال" انا جاي اشوفك انت...
قلت " تشوفني...؟
ومن غير ما اقوله اتفضل  كان اخد الكرسي وقعد عليه وبص لي بكل جراءة وقال" وحشتني فجيت اشوفك....
من صدمتي او فرحتي او لخبتي لقيتني وقعت علي الكرسي ...وسكت....خااااااااااالص
هو مسبنيش افكر كتير لانه كمل بسرعة " من امبارح وانا منمتش بفكر فيك...عايز اعرف كل شيء عنك...كل شيء
محبتش اسال اي حد ...انا عايزك انت اللي تقوليلي.....بتحبي اية بتكرهي اية..؟"
الغريبة انه مسألنيش انت بنت مين  وحياتك اية....؟
لقيتني بتكلم معاه في كل حاجة بحبها  , والغريبة اننا كنا بنفضل نفس الاشياء...نفس المطربين ونفس الكتاب ...نفس الافلام والممثلين....نفس الاكلات والفاكهه والخضار تخيلوا....
وقت كتير فضلنا نتكلم فيه عن كل حاجة ....
وبعدين قام وقال" انا لازم امشي...."
كنت عايزة اقولة لاء متمشيش....
سكت....انا ومعرفتش اقول حاجة.....
بص لي وقال" علي فكرة انا جبت لك هدية....وطلع من شنتطة كتاب....رواية " بين الاطلال"
حطها علي المكتب....وبعدين قال " علي فكرة الشريط ده كمان حلو اووي اية رأيك تسمعيه...؟
وطلع شريط  كاست من الشنطة ومد ايدة للكاست اللي علي المكتب وفتحه وشغل الشريط ....كانت اغنية ...ام كلثوم...  اللي بتقول فيها " اول عنية ما جت في عنية...عرفت طريق الشوق......"
وساب الرواية ....والشريط .....ومشي...........
*  * * * * *                                 * * * * * * *                           * * * * * * * 
فضلت  مش عارفة اعمل اية.....
حاسةاني ف دنيا تانية............
اول مرة اقابل شخص بالجرأة دي ....
يا ربي ....مش عارفة بجد  .........فضلت افكر في كل كلمة قلناها.....وكل حاجة متفقين فيها....
حاسيت اني روحت دنيا تانية من دنيا الاحلام والروايات الخيالية........
وفتحت الرواية ...........
وعلي الصفحة الاولي لقيت اهداء............
" الي من اسرتني من اول لحظة"
يا الله..............انا اعرف الحب من النظرة الاولي لكن دي اللحظة الاولي للحب............حتي في كلامه جريء ومختلف...
* * * * * * * *                                  * * * * * * * *                          * * * * *          
تاني يوم ...........
كالعادة............اول ما فتحت.............كان هو دخل
وقبل ما اقوله ازيك.............
كان الحاج  صاحب المعرض .........جه من السفر .........علي حظي.........
بص لي هو وقالي " انت مش هتسلمي علي الحاج...؟"
اما الحاج  اللي هو صاحب المعرض .............قالي" ازيك يا حبيبتي واخدني في حضنه وباسني ............ده كله ادام " هاني"
سيبت الحاج وبصيت لهاني لقيته بيبتسم ووجه كلامه للحاج وقال " ازيك يا حاج .....وبعدين بص لي وقالي " انت مش هتعرفيني علي بابا والا اية....؟ مش هتعرفيني علي الحاج....؟"
اه ما انا نسيت اقوله......ان الحاج هو بابا...............

ممممممممممممممممم ملحوظة
بجد اسفة للتأخير بس ظروف البلد اليومين دول خليتني معرفش اكتب شيء ...حتي اللي كتبته دلوقت مش حاسة بيه.........يا تري بكرة اية اللي هيحصل في مصر...بتمني يكون خير